Nuk rreshtin së përfituari klientët e Edi Ramës nga tenderat shumë milionësh. Një nga ato fusha ku miqtë e kryeministrit kanë marrë më shumë tendera është në sistemin e Shëndetësisë. Këtë gjë e tregon mjaft mirë edhe tenderi i fituar së fundmi. Tenderi i dhënë nga Spitali i Traumës me objekt “Furnizim me pajisje mjekimi (materiale konsumi) për shërbimin e Ortopedisë në SUT”, me një shifër rreth 160 milion lekësh.
Por kush është fituesi i këtij tenderi? Askush tjetër përveç “Trimed Shpk”, e cila në këto vitet e fundit vetëm në sistemin e Shëndetësisë ka marrë plot 758 tendera. Këto tendera kapin vlerën e 3.3 miliardë lekëve.
Por kush fshihet pas kësaj kompanie e cila ka arritur të përfitojë kaq shumë tendera? Nga kërkimet rezulton se deri në vitin 2017, aksionerja kryesore në këtë kompani ka qenë Vilma Nushi, e cila njihet për lidhjen e ngushtë që ka më kryeministrit Rama.
Më pas Nushi, ia ka shitur aksionet e saj, një biznesmeni anglez i quajtur Dominic Noel William Evans. Anglezi është bashkëshorti i mbesës së Nushit, Ledina Hidos.
Ai i ka mbajtur këto aksione për dy vite, më pas ia ka shitur, Endrit Hidos, i cili është i vëllai i gruas së tij ose thënë ndryshe nipi i Vilma Nushit.
Ndërsa si administratore, “ Trimed” ka Gentiana Peshkatarin e cila e kryen këtë funksion që në vitin 2016.
Vilma Nushi, njihet si një nga biznesmenet e cila ka fituar tendera me shifra stratosferike dhe që gjithashtu ka marrë edhe koncesionin e famshëm të “Check Up-it”
Edhe pse koncesioni i sterilizimit është marrë në dorë nga SPAK-u, mbeten për t’u parë nëse tenderat e fituar nga kjo kompani do të merren në shqyrtim.