Shumë herë nga foltorja e Partisë Demokratike e kanë akuzuar deputetin Sadri Abazin, se nipi i tij po përfiton tendera pa garë nëpër bashkitë e vendit, apo nëpër institucione të tjera shtetërore.
Por kësaj here këtë gjë e ka bërë një eksponente e PD-së. Pasi i dha një tender vëllait të Safet Gjiçit, kryetarja e Bashkisë së Shkodrës, Voltana Ademi, i ka dhënë dy tendera, kompanisë “ALKO-IMPEX General Construcion”, që ka si administrator Arbër Abazin, që është nipi i deputetit socialist.
Objekti i këtyre dy tenderave është “Shërbimi i Pastrimit Qytetit Zona Jugore A“ dhe “ Shërbimi i Pastrimit Qytetit Zona Veriore B“. Këto dy tendera kapin shifrën totale prej 262 milionë lekësh. Të dy këta tendera janë bërë me proçedurën “Me negocim pa shpallje paraprake të njoftimit”.
Tenderi i parë i cili ka si objekt “Shërbimi i Pastrimit Qytetit Zona Jugore A”, ka një fond prej 149 milionë lekësh.
Ndërsa tenderi i dytë me objekt “Shërbimi i Pastrimit Qytetit Zona Veriore B”, ka një fond prej 112 milionë lekësh.
Të dy tenderat janë shpallur në 31 dhjetor të 2019-s, ndërsa lidhja e kontratës është bërë me 6 shkurt.
Por kjo kompani nuk është e panjohur për publikun, pasi renditet në 5 kompanitë që ka fituar më shumë tendera gjatë 4 viteve të fundit.
Sipas të dhënave të Thesarit, gjatë viteve 2015-2019, kjo kompani ka përfituar nga buxheti i shtetit, plot 22 miliardë lekë.
Kujtojmë që kjo kompani para disa vitesh është akuzuar se ka përfituar tendera me dokumenta false.