Bashkia e Tiranës ka hapur disa kantiere punimesh, ku po kryhen rikonstruksione në rrugë të ndryshme, bulevarde apo parqe të ndryshme.
Një prej kantierëve më të mëdhenj ku po bëhën punime është “ Parku Rinia”, i cili po rehabilitohet dhe po risillet në një mënyrë ndryshe siç ishte më parë.
Fillimin e punimeve në këtë park e njoftoi, kryetari i Bashkisë së Tiranës, Erion Veliaj nëpërmjet një postimi në Facebook në 18 korrik të 2019-s. Ndërsa në tabelën e vendosur afër parkut, thuhet se afati i punimeve është 8 muaj kalendarik.
Por çfarë ka ndodhur pas 7 muajsh në këtë park?
Edhe pse punimet do të duhet të ishin drejt përfundimit, në fakt pamjet nga Parku Rinia tregojnë një realitet krejt të hidhur. Në park janë vendosur disa grumbuj dherash, që sipas projektit më pas do të kthehen në një zonë gungash.
Por siç çdo punim që bëhet nga Bashkia e Tiranës, as Parku Rinia nuk do të ketë fatin të mbarojë brenda afatave të vendosura. Do të ishte një rekord për “ Guinness”, nëse këto punime do të mbarojnë brenda afatit që është cilësuar në kontratën midis Bashkisë dhe “Agi Kons”
Mirëpo ky rikonstruksion i këtij parku do t’i kushtojë qytetarëve të Tiranës, plot 780 milionë lekë. Por a ia vlejnë realisht gjithë këto para vetëm për disa gunga në qendër të qytetit dhe që i prishin pamjen këtij parku.