Nga përfundimi i ekspertizës mjeko-ligjore të policisë shkencore, rezultoi se Konstandin Kacifas nuk u qëllua nga RENEA, por ai vrau veten. Nga ekspertiza rezultoi se Kacifas kishte dy plumba në trup.
Mirëpo, shumë pak pas publikimit të lajmit në lidhje me ekspertizën ndaj Kacifasit, erdhi reagimi i Prokurorisë së Gjirokastrës.
Në njoftim thuhet se çështja është ende në fazën e hetimit paraprak dhe nuk ka arritur në një përfundim në lidhje me këtë çështje.
"Ky procedim penal vazhdon të ndodhet në fazën e hetimeve paraprake dhe nga ana jonë nuk është arritur në asnjë konkluzion në lidhje me zgjidhjen e çështjes. Kjo çështje penale është regjistruar për veprat e parashikuara nga nenet 79/dhe 22, 278/1 e 76 të K.Penal", thuhet në njoftim.
Më tutje, raportohet se Prokuroria pranë Gjykatës së Shkallës së parë Gjirokastër siguron publikun se do të kryejë hetimin me objektivitet e pa anësi
Njoftimi i Prokurorisë:
Prokuroria pranë Gjykatës së Shkallës së Parë Gjirokastër, duke u nisur nga transmetimi në media i disa informacioneve ditën e sotme, çmon të nevojshme që nëpërmjet kësaj deklarate, të sqarojë publikun si më poshtë: Në Prokurorinë pranë Gjykatës së Shkallës së Parë Gjirokastër, është regjistruar proçedimi penal nr. 824 në datën 24.12.2019, pas transferimit të akteve nga Prokuroria pranë Gjykatës së Shkallës së Parë për Krimet e Rënda. Ky proçedim penal bën fjalë për ngjarjen ku ka humbur jetën shtetasi Kostandinos Kaçifas. Ky proçedim penal vazhdon të ndodhet në fazën e hetimeve paraprake dhe nga ana jonë nuk është arritur në asnjë konkluzion në lidhje me zgjidhjen e çështjes. Kjo çështje penale është regjistruar për veprat e parashikuara nga nenet 79/dhe 22, 278/1 e 76 të K.Penal. Çdo informacion i publikuar në media, pa ju referuar burimeve zyrtare, dëmton rëndë hetimet dhe nuk kontribuon në zgjidhjen e drejtë të çështjes. Prokuroria pranë Gjykatës së Shkallës së parë Gjirokastër siguron publikun se do të kryejë hetimin me objektivitet e pa anësi dhe do të parashtrojë zgjidhjen e drejtë të kësaj çështjeje penale. DREJTUESI I PROKURORISË.
