Vijon të rritet ndjeshëm bilanci i viktimave nga koronavirusi, i njohur ndryshe edhe si Covid-19 nga OBSH.
Autoritetet kanë konfirmuar këtë mëngjes se numri i viktimave ka shkuar në 1,669, ku vetëm gjatë 24 orëve të fundit virusi vdekjeprurës u ka marrë jetën 142 personave në të gjithë Kinën.
Po ashtu është rritur ndjeshëm edhe numri i të prekurve nga koronavirusi, duke shkuar në mbi 69,000.
Vetëm katër vdekje janë regjistruar jashtë Kinës. Vdekja e parë që ndodhi jashtë Azisë u raportua të shtunën në Francë, ku një turist 80-vjeçar që trajtohej nga 25 janari nga koronavirusi ndërroi jetë.
Tre vdekjet e tjera jashtë Kinës janë regjistruar në Hong-Kong, Filipine dhe Japoni.
Autoritetet shëndetësore kineze raportojnë se thuajse 9,500 pacientë me koronavirus janë trajtuar dhe kanë lënë spitalet në të gjithë Kinën.
Megjithatë, ekzistojnë shqetësime se masat e rrepta të marra në të gjithë vendin mund të mos kenë qenë të mjaftueshme për të frenuar përhapjen me ritme të shpejta të virusit vdekjeprurës në disa qytete të mëdha të Kinës, të cilat kanë qenë të izoluara totalisht prej gati një muaji.
Koronavirusi i ka shkaktuar dëme të mëdha ekonomike Kinës. Për shkak të kësaj, Kina po përpiqet të rikthejë në punë bizneset që u mbyllën dhe të rihapë shkollat që u pezulluan për javë të tëra.
Ekspertët e ekonomisë thonë se niveli i krizës ekonomike të shkaktuar nga koronavirus është i menaxhueshëm. Nëse numri i rasteve të reja të koronavirusit ngadalësohet, dhe fabrikat e e Kinës rihapen së shpejti, dëmi ekonomik do të jetë vetëm për tre mujorin e parë.
Nëse virusi vazhdon të përhapet me shpejtësi, dëmi ekonomik do të jetë më i madh.
Burimi: CNN|Përktheu dhe Përshtati: JOQ Albania