Detaje të reja janë zbardhur nga grabitja e regjistuar në Lignano të Italisë, ku katër shqiptarë lidhën dhe dhunuan barbarisht një biznesmen 85-vjeçar, të cilit i morën paratë që mbante në shtëpi .
Së fundmi janë zbuluar emrat e shqiptarëve, të cilët u arrestuan nga karabinierët.
Ata janë: Taulant Frroku, 30-vjeç, Zef Haxhia, 29-vjeç, Aviljam Vuka, 28-vjeç dhe Eugen Gjonaj, 26-vjeç, të katërt rezident në Forli.
Katër shqiptarët e arrestuar u dërguan në burgun e Udines, në pritje të vendimit të gjykatës. Ata akuzohen për plaçkitje dhe dhunim.
Biznesmeni që ra pre e grabitjes dhe dhunës së ushtruar nga shqiptarët është Giuseppe Sparta, i cili menaxhon një zonë në plazhin e Lignanos.
Ai u lidh këmbë e duar dhe u dhunua nga agresorët.
85-vjeçari ndodhet në spital, ku mjekët i kanë konfirmuar se i janë thyer të paktën katër brinjë.
Në një prononcim për mediat italiane, ai tha se pak kohë më parë kishte rënë pre e një tjetër grabitjeje.
I moshuari tha se pas grabitjes së parë, ai nuk mbante në shtëpi më shumë se një mijë euro.
Ngjarja e rëndë ndodhi mesnatën e së premtes.
