Avokati i Agron Begos, Niko Bega ka rënë në prangat e policisë pasi tentoi që të ndryshonte dëshminë e një prej vajzave të ngacmuara seksualisht nga profesori në Fier. Rrëfimet dhe detajet tronditëse janë bërë publike në emisionin 'Stop' në Tv Klan.
Avokati 53-vjeçar, Niko Bega në Fier, me profesion Avokat pranë dhomës së avokatisë Fier, ka shfrytëzuar pozicionin. Për këtë, ai i ka kërkuar një personi që të ndikonte te nxënësja që të ndryshonte thëniet e saj në ngarkim të klientit të avokatit, profesor Agron Bego.
Ndërkohë, bëhet me dije se materialet i kaluan SPAK për veprime të mëtejshme.
Njoftimi i policisë:
Menjëherë pas videos së publikuar në emisionin investigativ “Stop” në mbrëmjen e datës 19 Shkurt 2020, nga Specialistët e Sektorit për hetimin e krimit ekonomik e financiar në Drejtorinë Vendore të Policisë Fier, pas hetimeve intensive, u bë ndalimi i shtetasit: Niko Bega, 53 vjeç, banues në Fier, me profesion Avokat pranë dhomës së avokatisë Fier. Ndalimi i këtij shtetasi u bë pasi dyshohet për veprën penale “Korrupsion aktiv”. Ky shtetas, duke shfrytëzuar pozicionin e tij si avokat, i ka kërkuar një shtetasi të ndikonte te nxënësja që të ndryshonte thëniet e saj në ngarkim të klientit të avokatit i cili është me masë sigurimi “Arrest me burg” për veprën penale “Ngacmim seksual”. Materialet i kaluan SPAK, për veprime të mëtejshme.