Dalin pamjet, si u nxorr me forcë jashtë sallës studenti që ia përplasi në sy Ramës

Kryeministri i vendit, Edi Rama, ishte i pranishëm mbrëmjen e sotme në ceremoninë e diplomimit të studentëve të Mjekësisë.

Por jo gjithçka i ka shkuar siç duhet kreut të qeverisë, pasi indinjata e studentëve ndaj tij duket se ka arritur kulmin.

Rama u ndërpre disa herë nga studentët, ku nuk munguan as thirrjet "Rama ik", të cilat tashmë janë kthyer në një "trend", që praktikohen jo vetëm në stadiume, sheshe, rrugë e lokale, por tashmë edhe në ceremoni diplomimesh.

Mirëpo, ai që e "tërboi" më tepër Ramën, ishte një student, i cili nga salla tha:

Kam prerë biletën për arratisje nga Shqipëria. Diplomën e duan si bileta për arratisje."

Pas këtij zëri në sallë ushtuan thirrjet "Rama ik" dhe nisën duartrokitjet për të riun që ia përplasi në sy Ramës realitetin e trishtë me të cilin përballet sot studentët shqiptarë.

Rama u përpoq ta kalonte me sportivitet këtë moment, duke mos kursyer ofendimet dhe ironinë ndaj studentit, i cili nesër do të jetë mjek i ardhshëm.

Kryerilindasi iu drejtua studentëve të tjerë me fjalët:

Është një individ në shërbimin tuaj që të filloni të ushtroni profesionin. Merreni, jepini recetën e duhur. Në kohën e kaq shumë barnave të rimbursueshme i merr falas dhe nesër do të jetë më mirë

Pas këtij debati në distancë midis studentit e Ramës, forcat e sigurisë së kryeministrit e shoqëruan me forcë të riun, që guxoi të ndërhynte gjatë fjalës së kryerilindasit.

Mesa duket, Rama nuk mund t'i durojë aspak kritikat ndaj tij dhe qeverisë që drejton, gjë të cilën e ka treguar më së miri edhe ndaj mediave kritike, të cilat është përpjekur me çdo formë e mënyrë, që t'ua kyçë gojën.