Kryeministri i vendit, Edi Rama ka qenë i pranishëm në një ceremoni diplomimi të studentëve të Mjekësisë ditën e sotme. Teksa mbante fjalën e tij, Rama është ndërprerë disa herë nga disa studentë.
'Rama ik', ishin thirrjet më të shpeshta. Por ajo që i prishi fjalimin kryeministrit ishte pikërisht ndërhyrja e një studenti me thirrjen “Kam prerë biletën për arratisje nga Shqipëria”.
Rama edhe këtu nuk ka kursyer ofendimet e tij duke iu drejtuar mjekëve të ardhshëm se në sallë ndodhet një pacient i tyre.
Mirëpo, menjëherë pak pas replikës në distancë me kryeministrin, të riun e gjen belaja. Ai është marrë me forcë nga truprojat e kryeministrit dhe është nxjerrë jashtë sallës.
Kanë qenë 4 badigardë që e kanë nxjerrë studentin jashtë, ndërkohë brenda sallës gumëzhinit të tjerët.
Lëvizja Për Universitetin bën me dije se janë dy të rinj që u nxorën jashtë, jo vetë një, me urdhrin e Ramës, pikërisht aktivistët Enriko Peçulaj dhe Emiljando Kita.
Bëhet me dije se ata mbahen të mbyllur në qelitë e komisariatit nr. 1.
Lëvizja për Universitetin shkruan:
Aktivistët e Lëvizjes Për Universitetin i përplasin në fytyrë Edi Ramës realitetin e zymtë në të cilin ndodhet shëndetësia dhe profesioni i mjekut. Sot pasdite, Edi Rama kishte zgjedhur ceremoninë e diplomimit të studentëve të Universitetit të Mjekësisë si platformën e propagandës së tij qeveritare. Aktivistët Enriko Peçulaj dhe Emiljando Kita i kujtuan plakut që ka mbërthyer të gjitha pushtetet se diploma e mjekut është kthyer në biletë avioni për në Gjermani dhe se përbën një luks vetëm për ata studentë që mund ta përballojnë tarifën e kripur. Mjekët shqiptarë kanë pagat më të ulëta në rajon me vetëm 408-527 euro në muaj. Në pesë vitet e fundit janë larguar 857 mjekë nga Shqipëria, ndërkohë që 78% e mjekëve të anketuar shprehen se dëshirojnë të largohen drejt Gjermanisë. Buxheti i shtetit për mjekësinë është më i ulëti në rajon dhe Evropë me vetëm 2.9% të PBB. Tarifa e Masterit në disa degë të UM është më e larta në vend, me mbi 200.000 lekë (të reja) në dy vjet. Për më tepër, Edi Rama ka ngritur skemën më të madhe të vjedhjes së shqiptarëve përmes PPP-ve pikërisht në sektorin e shëndetësisë, ku në dhjetëvjeçarin e ardhshëm qeveria shqiptare ka autorizuar pagesën prej 38 miliardë lekësh për vetëm katër koncesione: Check-up-i (8.8 miliardë lekë), sterilizimi i sallave (12.3 miliardë lekë), shërbimi i hemodializës (1.5 miliardë lekë) dhe shërbimet laboratorike (13 miliardë lekë). Ndërkohë, batutat e ‘plakut Mere’ dëshmojnë gjendjen e tij të mjeruar. Brezi i ri i mjekëve dhe infiermerëve nuk e meriton Edi Ramën si kryeministër. Ata duhet t’i bëjnë rezistencë shkretimit të mëtejshëm të profesionit të tyre. Aktivistët Enriko Peçulaj dhe Emiljando Kita janë nxjerrë jashtë nga truprojat e Edi Ramës dhe mbahen të mbyllur në qelitë e komisaritatit nr. 1. U bëjmë thirrje të gjithë aktivistëve të bashkohen për të kërkuar lirimin e menjëhershëm të tyre.
