Ish-kryebashkiaku i Durrësit, Vangjush Dako, është parë pasditen e të enjtes në Milano të Italisë.
Siç shihet dhe fotot e siguruara nga JOQ Albania, Dako sapo ka mbërritur në aeroportin Malpensa.
Ish-kryebashkiaku socialist ndodhet nën shoqërinë e një gruaje, e cila mendohet se është bashkëshortja e tij.
Personi që realizoi fotot shprehet se Dakos i është bërë një kontroll normal i pasaportës nga punonjësit e aeroportit.
Nuk dihet qëllimi i vizitës së ish-kryebashkiakut të qytetit bregdetar, ndërsa ajo që bie në sy është se Dako shfaqet buzagaz dhe tepër entuziast, për arsye që vetëm ai i di.
Ky udhëtim i Dakos vjen në një kohë kur ka vetëm pak ditë që Shqipëria mori 1.15 miliard euro donacione për tërmetin e 26 nëntorit, nga të cilat 885 milion janë hua (borxh), ndërsa të tjerat janë grante (donacione).
Kujtojmë këtu që ndaj Dakos janë ngritur një sërë akuzash, duke nisur që nga përgjimet e publikuara nga Bild, ku dëgjohet teksa komunikon me Avdylajt, e deri tek përgjegjësia për firmosjen e lejeve të ndërtimit në Durrës, për pallatet dhe ndërtesat që u shkatërruan pas tërmetit të 26 nëntorit, që u mori jetën 51 personave, përfshi fëmijë, studentë, të rinj, gra, burra e të moshuar.
Dosja 339, ku përmendet edhe Dako, i cili u akuzua nga opozita për vjedhje votash, është marrë nën hetim nga SPAK. Deri më tani, Dakos "s'i ka hyrë asnjë gjemb në këmbë".
Vlen të theksohet që Dakos i është ndaluar familarisht hyrja në SHBA.