Autoritetet italiane kanë përditësuar të dhënat mbi situatën e koronavirusit gjatë 24 orëve të fundit, ku është rritur sërish numri i viktimave në krahasim me një ditë më parë.
E premtja e javës së kaluar ishte dita më vdekjeprurëse nga koronavirusi në shtetin fqinj, ku u shënuan 969 viktima brenda një dite, të shtunën humbën jetën 889 persona, të dielën ndërruan jetë 756 persona, ndërsa dje humbën jetën 812 persona.
Ndërkohë, Mbrojtja Civile ka raportuar se sot kanë humbur jetën 837 persona, 25 më shumë se një ditë më parë.
12,428 ka shkuar numri total i viktimave nga Covid-19 këtë të martë.
Sipas të dhënave zyrtare, numri total i të infektuarve nga koronavirusi, përfshirë edhe ata që janë shëruar dhe viktimat, ka shkuar në 105,792.
Gjatë 24 orëve të fundit janë konfirmuar edhe 4053 raste të reja, duke e çuar numrin total të rasteve aktive në 77,635.
Nga shpërthimi i epidemisë e deri më tani, 15,729 persona janë shëruar plotësisht, ndërkohë që 4023 të tjerë ndodhen në gjendje kritike për jetën, në kujdes intensiv.
Burimi: Rai News|Përktheu dhe Përshtati: JOQ Albania