“Po na trajtojnë si qenër”, shqiptarët në kushte çnjerëzore në burgun grek: Edhe ujin e kemi blerë me lekët tona

Tre shtetas shqiptarë, të cilët po mbahen prej më shumë se dy muajsh në qelitë e paraburgimit grek të Igumenicës në kushte çnjerëzore.

Ata kanë dërguar edhe pamje nga qelia ku kushtet janë vërtetë për të vënë duart në kokë.

Siç shihet dhe në video, vendi është plot me lagështi dhe ata janë detyruar të flenë në tokë.

Shqiptarët shprehen për JOQ Albania se përveç kushteve çnjerëzore në të cilat ata po mbahen, trajtohen keq edhe nga personeli i burgut, të cilët sipas tyre nuk u kanë siguruar as ujin e pijshëm.

I pyetur nga JOQ, një prej tyre thotë se edhe ujin e pijshëm detyrohen ta blejnë nga xhepi i tyre, ndërsa shton se vetëm me shqiptarët sillen në këtë mënyrë.

Ata janë ndaluar nga policia për mungesë dokumentesh dhe ende nuk kanë dalë para gjykatës.

Të rinjtë shqiptarë thonë se autoritetet u kanë thënë se shtyrja e seancës gjyqësore është bërë për shkak të pandemisë Covid-19.

Ata i kanë bërë thirrje kryeministrit Rama që të marri masa.

Një prej shqiptarëve thotë në video:

Përshendetje JOQ! Ketu ndodhemi live neper birucat e Greqise, ne 2020 shiko ku na kane katandisur, na mban greku si puna e qenerve. Shikojeni vete, duken pamjet, gjerat. I bejme thirrje zotit kryeminister Edi Rama qe te marri masa, kemi dy muaj.

Vlen të theksohet se kjo nuk është hera e parë që të ndaluarit shqiptarë mbahen në të tilla kushte në burgjet greke.

Ndonëse raste të tilla janë denoncuar në media, Ambasada Shqiptare në Greqi nuk e ka vënë aspak ujin në zjarr për shqiptarët e detyruar të qëndrojnë në "kafazet e birucat" greke.