Ronald Kryemadhi u arrestua nga policia me akuza për sulm ndaj efektivëve dhe rezistencë. Ndërsa në deklaratën e saj bashkëshortja e mbrojti duke thënë se policia i besdiste prej kohësh për shkak se nuk çojnë në shkollë fëmijët dhe se burri i saj nuk mban armë.
Ndërsa detaje të tjera rreth incidentit bëhen me dije nga dosja e prokurorisë e cila është siguruar nga Faxweb.
Në dosjen e prokurorisë thuhet se Kryemadhi nuk ka qenë në banesë në momentin kur policia ka shkuar në derën e tij, dhe ka qenë duke iu drejtuar banesës me biçikletë.
Në momentin kur ka ndeshur efektivët ai ka rezistuar ndaj përpjekjeve të tyre për ta dërguar në gjykatë.
Ai arriti të largohet pasi qëlloi njërin prej policëve ne bark ndërsa hipi në tarracën e banesës së tij me një armë në dorë, nga ku më pas ka kanosur dhe punonjësit e Policisë.
Kryemadhi ka bërtitur më pas me zë të lartë “pasha Allahun largohuni që këtu se do ju vras”. Më pas ai ka zbritur nga banesa dhe i ka drejtuar armën një tjetër polici nga dera, duke e kërcënuar se do e vriste.
Nisur nga fakti se Kryemadhi ka qenë i armatosur, policia ka kërkuar ndihmë nga RENEA, që me mbërritjen në banesë, çuditërisht nuk e kanë gjetur armën të cilin ai mbante në dorë më herët.
Ndërkohë që pas kontrollit në banesë, ata kanë gjetur vetëm një thike me teh nga të dyja anët. Prokuroria e vlerëson të ligjshëm arrestin e Kryemadhit.