Agim Kajmaku prej muajsh i shpallur në kërkim është liruar nga gjykata e Apelit vetëm një ditë pas arrestimit.
Shkak për ndalimin e tij u bënë problemet me shëndetin të cilat e detyruan të shkonte për vizitë në spital ndërsa ishin vetë mjekët që njoftuan policinë.
Ish-kryebashkiaku socialist i Vorës, është lënë i lirë nga Trupa Gjykuese e përbërë nga gjyqtarët Elona Tora, Albana Lluri dhe Zengjine Sallaku të cilët kanë ndryshuar masën e sigurisë nga "Arrest në burg" në "Detyrim paraqitje".
Ka qenë vetë organi i akuzës, i përfaqësuar nga Arta Marku që ka kërkuar zbutjen e masës së sigurisë me argumentin se Kajmaku nuk mund të qëndronte në burg pasi nuk është në gjendje të mirë shëndetësore.
Kujtojmë se Agim Kajmaku u zgjodh në krye të Bashkisë Vorë në zgjedhjet e 30 qershorit 2019, por u denoncua nga PD se kishte fshehur dënimin në Greqi për falsifikim parash.
Ai mohoi akuzat fillimisht por u vërtetuan nga Prokuroria shqiptare dhe kjo pasoi me shkarkimin e tij nga posti i kryebashkiakut.