Pak ditë më parë një ngjarje tragjike nguli kthetrat e saj të zeza në mendjen dhe zemrat e të gjithë shqiptarëve. Një i ri vetëm 25-vjeç u ekzekutua nga policia në mes të Tiranës vetëm sepse kishte guxuar të dilte jashtë shtëpisë për të blerë cigare tek kioskat 24-orëshe. Ngjarja siç tashmë dihet, bëri bujë të madhe dhe mijëra shqiptarë mbushën sheshet e gjithë Shqipërisë si dhe në mjaft kryeqytete të botës para ambasadave shqiptare. Zemërimi ishte dukshëm mjaft i madh, sidomos tek të rinjtë të cilët vërshuan në rrugë.
Mirëpo për habi, vetëm dy ditë pas vrasjes së të riut, Erion Veliaj gjen kohë të hapë një tender me vlerë rreth 35 milionë lekë të vjetra me TVSH për të festuar! Sipas tenderit që mban numrin e referencës REF-81594-12-09-2020 dhe ka për objekt “Fishekzjarre për festat e fundvitit”, rezulton se Erion Veliaj parashikon të blejë deri në 35 milionë lekë të vjetra fishekzjarre për të festuar. Nuk dihet mirë se çfarë do të festojë Veliaj, në një kohë që gjithë ekonomia është përtokë për shkak të COVID-19.
Fare mirë këto para mund të përdoreshin për njerëzit në nevojë apo qoftë edhe për të trajnuar policët e tij se si të sillen në mënyrë më njerëzore me fshatarët e shkretë të cilëve u shkelin me këmbë lakrat e sallatan që shesin për bukën e gojës. Për çudi Veliaj e ka hapur këtë tender vetëm dy ditë pas vrasjes së të riut nga policia kur vendi dhe rinia ziente nga inati, duke treguar në këtë mënyrë se në realitet nuk ka respekt për asgjë.