Ministria për Evropën dhe Punët e Jashtme, ditën e sotme ka bërë me dije se pala greke ka përforcuar masat anti-covid në Pikën e Kalimit kufitar në Kakavijë për periudhën 1 deri më 15 mars. Duke nisur nga dita e hënë, datë 1 mars, Pika Kufitare do të jetë e hapur nga ora 07:00 deri më 19:00, në vend të orës 23:00 që ka qenë deri më tani. Gjithashtu, do të ketë një kufizim edhe të numrit të personave që futen çdo ditë. Pra nga 750 persona do të lejohen vetëm 400. Vlen të thuhet se ata që do të futen në Greqi do t'i nënshtrohen një testi të shpejtë, nga i cili nuk do të përjashtohen edhe shoferët e kamionëve apo mauneve. Ndërkohë, të gjithë ata që do të rezultojnë pozitiv, nuk do të lejohen të hyjnë në Greqi. Ndërsa, ata që hyjnë do t'i nënshtrohen një karantine të detyrueshme 14 ditore nga 7 ditë që ishte deri më tani.