Në listën e publikuar së fundmi me 5 lojtarët e paprekshëm të Juventusit të cilët nuk janë në shitje për këtë verë, bie në sy mungesa e Cristiano Ronaldos. Ky i fundit tashmë nuk konsiderohet më i “paprekshëm” në skuadrën e Juventusit. Pas disfatave të njëpasnjëshme që ekipi po kalon, drejtuesit janë duke shqyrtuar hipoteza të ndryshme në lidhje me rindërtimin e skuadrës me qëllim arritjen e sukseseve në të ardhmen.
Bianconerët janë duke menduar që të “rinojnë” ekipin e tyre me lojtarë të rinjë në moshë, duke larguar veteranët nga ekipi. Në edicionin e sotëm të La Gazzetta dello Sport raportohet se janë vetëm pesë lojtarë të Zonjës së Vjetër, të cilët janë të paprekshëm nga tregu i transferimeve. Ata janë Federico Chiesa, Dejan Kulusevski, Matthijs de Ligt, Arthur dhe Danilo.
Të gjithë të tjerët janë në dispozicion për “t’u shitur” për çmimin e duhur apo janë pranë përfundimit të karrierës, si Giorgio Chiellini dhe Gianluigi Buffon. Edhe pse Fabio Paratici vazhdon të thotë se Ronaldo është pjesë e planeve të Juves, rroga e tij prej mbi 30 milionë euro në vit është një problem tejet serioz për buxhetin e ekipit. Ndërkohë, Paulo Dybala i cili ka luajtur shumë pak këtë sezon dhe ka kontratë deri në vitin 2022, mund të shitet për të përfituar fonde.