Në orët e para të mëngjesit të sotëm në redaksinë e JOQ Albania erdhi një raportim i pazakontë. Një gjest heroik, ku protagonisti ishte një djalë i cili i kishte shpëtuar jetën një punëtori të thjeshtë në një kabinë që ishte përfshirë nga flakët tek ish-Sheshi Shqiponja pranë Doganës. Brenda kishte mbetur një punëtor të cilit i erdhi në ndihmë heroi i ditës. “Një çun shkoi me vrap dhe e nxori nga dritarja e kabinës ndërkohë atij punëtorit i kishte marrë flakë këmba ose xhupi”-ishin raportimet e para të dëshmitarëve që kishin parë të gjithë skenën e ngjarjes.
Kalimtarë të rastit kishin bërë dhe foto për të dëshmuar rastin, i cili pasi u bë publik në kërkim të identitetit të heroit të paidentifikuar, erdhi reagimi i parë nga ai vetë. I riu me inicialet H.G, rrëfeu për JOQ se ishte duke shkuar në punë me biçikletë dhe nuk mund të qëndronte indiferent para një jete njerëzore, duke hyrë në kabinë duke e mbajtur nga shpatullat për ta nxjerrë jashtë.
Në momentin kur gazetarët e tanë i kërkuan të bëhej publik në mënyrë që familja e punëtorit të mund ta falenderojnë për gjestin heroik, ai u shpreh me fjalët modeste: Jam punëtor vetë dhe shpëtova një punëtor tjetër.