Një përleshje mes të miturish në kryeqytet, ka përfunduar me masakrimin e një 15-vjecari, i cili është qëlluar me thikë në qafë dhe pas kësaj, fëmija tjetër që e ka dëmtuar rëndë për jetën, është arrestuar. Grupi i fëmijëve që u përfshinë në konflikt fizik me tavlla duhani dhe thika, përfunduan në polici dhe kur u pyetën për ngjarjen e rëndë, treguan se gjithçka kishte nisur pas një takimi për t’u sqaruar mes palëve, duke qenë se njëri ndër ta, i kishte bërë presion psikologjik shokut të tij.
Fëmija i dëmtuar rëndë dhe i goditur në qafë ka inicialet A.B. Ai është operuar në spitalin e traumës, ndërsa gjendja e tij shëndetësore pas ndërhyrjes vijon të jetë kritike. Burime nga policia thonë se grindja u raportua në sallën operative, ku njëri nga punonjësit e një qendre tregtare, kërkoi ndihmën e policisë për një fëmijë, i cili ishte rrëzuar i përgjakur në tokë.
“Në verandën e lokalit vihen re tavolina dhe karrige në formë të ç’rregullt dhe njolla gjaku. Në një karrige u gjet një telefon dhe një xhup në ngjyrë blu. Më pas këqyrja vazhdoi në një ambient të jashtëm, ku u gjet brenda një pakete një thikë me hapje mbyllje me ngjyrë të zezë, e ndotur me njolla të kuqe, si ato të gjakut, e cila u mor për verifikime të mëtejshme”, -thotë policia për Gazeta Si
Duke kërkuar të miturit e përfshirë në përleshje, policia gjeti dy të miturit e parë me inicialet K.P., dhe M.T. dhe më pas edhe të miturin e tretë, J.B. Ata janë pyetur në prani të prindërve dhe psikologëve për shkak të moshës së mitur.
Fëmija i parë tregon
Ai quhet K.P., nuk ka mbushur ende 15 vjeç dhe rrëfen se si bashkë me shokun e tij, M.T., u nisën për të pirë kafe në një lokal që gjendet në qendrën tregtare.
“Pasi vajtëm në lokal, porositëm kafe. Arsyeja pse shkova në lokal, ishte se lashë takim për t’u sqaruar me A.B.,(i plagosur rëndë me thikë më pas).
Dy fëmijët tregojnë se kanë pritur gjatë derisa aty kanë mbërritur A.B., dhe J.B., dhe ata nën moshë.
Fëmija tregon se së bashku me shokun, u larguan me vrap dhe e fshehën thikën në hyrje të një pallati tek ish-Parku i Autobusëve. Agjentët e pyesin, se përse kishin lënë takim me fëmijën e dëmtuar rëndë?
“Arsyeja është se para disa ditësh, shoku i tij pra shoku i A.B., kishte bërë sherr dhe ishte zënë me ca çuna që janë të vegjël në moshë. A. më mori mua më telefon dhe më kërkoi takim”,- thotë fëmija.