Ditët e fundit lajmi kryesor në media ka qenë bllokimi i punës në aeroportin e Rinasit për shkak të një problemi mes kontrollorëve ajrorë dhe shoqërisë ALBCONTROL. Kjo e fundit është shoqëri aksionare me kapital 100% shtetëror, pronë e Ministrisë së Zhvillimit Ekonomik, Turizmit,Tregëtisë dhe Sipërmarrjes.
ALBCONTROL u krijua si ndërmarrje shtetërore në vitin 1992 dhe në 3 shkurt 1999, u transformua në shoqëri aksionare, e quajtur Agjencia Nacionale e Trafikut Ajror. ALBCONTROL menaxhon dhe kontrollon hapësirën ajrore Shqiptare (FIR), në përputhje me standartet ndërkombëtare të lundrimit ajror. Që prej vitit 2003, ALBCONTROL është anëtare e EUROCONTROL.
Problemi me kontrollorët ishte një problem pagese, pasi ndonëse pagat e kolegëve të tyre në vendet e tjera të rajonit shkonin nga 6 mijë deri në 9 mijë euro në muaj, ALBCONTROL i paguante ata vetëm 4 mijë euro. Mirëpo prej muajsh kjo rrogë ishte thuajse përgjysmuar duke arritur në nivelet e rreth 2500 euro në muaj. Zyrtarisht ALBCONTROL u justifikua se nuk kishte para për të paguar kontrollorët për shkak të situatës së COVID-19.
Mirëpo gjykuar nga tenderat që ky institucion ka organizuar, duket se kjo arsye nuk është shumë bindëse. Themi kështu pasi vetëm në 24 orë ALBCONTROL i ka dhënë plot 600 milionë lekë të vjetra me TVSH kompanisë R & T të biznesmenit Renis Tërshana. Bëhet fjalë për dy tendera, përkatësisht i pari me numër reference REF-88770-03-02-2021 dhe i dyti me numër reference REF-88761-03-02-2021.
Tenderi i parë ka për objekt “Shpenzime mirëmbajtje dhe blerje pjese ndërrimi për sistemin VCR RICHOCHET (JOTRON)” ndërsa i dyti ka për objekt “Blerje pjese ndërrimi dhe kontratë mirëmbajtje VCS – INDRA, GAREX”. Të dy tenderat janë dhënë në thuajse të njëjtat kushte, pasi në të dy ka marrë pjesë vetëm kompania fituese R & T pa asnjë konkurrent. Gjithashtu po tek të dy tenderat shikohet se vlera fituese është thuajse identike me vlerën e fondit limit, përkatesisht sa 99.93% tek tenderi i parë dhe 98.46% tek tenderi i dytë. A doni më për Belulin miq?