Mëngjesin e sotëm, Faxnews dhe kandidati për deputet i LSI në Gjirokastër, Vangjel Tavo, postuan pamje nga reparti zjarrfikëses në qytet, ku shiheshin pako të mëdha me ushqime të ndryshme, makarona, sheqer dhe miell. Sipas kandidatit për deputet këto ushqime do të përdoreshin për fushatë nga sekti i Rilindjes, dhe për një kohë të gjatë nuk u mor asnjë përgjigje. Por mesa duket, Kryetari i Bashkisë, Flamur Golemi, ka marrë kohën e duhur dhe ka ardhur me një përgjigje, që ndoshta të gjithë e prisnin.
Ai është shprehur se ndihmat kanë ardhur nga Gjermania dhe janë për familjet në nevojë. Sipas Golemit ato i përkasin një fondacioni gjerman.
Ai shkruan:
Në respekt të qytetarëve të Gjirokastrës, po shpjegoj këtë “mega skandalin” e Vangjel Tavos. Bashkia Gjirokastër ka marrë një donacion me ndihma ushqimore nga kompania “Kelmendi” në Gjermani, me përfaqësues z.Morin Radoniqi, të cilin gjej sërish rastin ta falenderoj, që njësoj si vjet gjatë pandemisë na është gjendur pranë për familjet në nevojë.
Ndihmat ushqimore kanë ardhur në Gjirokastër disa ditë më parë konform gjithë procedurave përkatëse dhe janë vendosur përkohësisht në ambientet e Drejtorisë së Shërbimit Zjarrfikës. Nga e njëjta kompani ne kemi marrë ndihma për familjet në nevojë edhe një vit më parë gjatë karantinës. Është një donacion bujar që ne e vlerësojmë shumë dhe e mirëpresim sepse çdo kontribut për familjet në nevojë është i rëndësishëm.
Lidhja e këtyre ndihmave me zgjedhjet është imagjinatë e Vangjel Tavos, për ne është proces rutinë që e kemi bërë vjet gjatë karantinës dhe do të vazhdojmë ta bëjmë sa herë te kemi mundësi për të ndihmuar njerëzit në nevojë.