Juliana Memaj është kryebashkiakja e Urës Vajgurore(Dimal), e cila së fundmi është kallëzuar në Spak nga një qytetar, pasi këtij të fundit iu prish banesa edhe pse kishte dokumentacion të rregullt. Këtë gjë e ka vërtetuar dhe gjykata e Beratit, e cila i ka dhënë të drejtë qytetarit, duke i kërkuar prokurorisë të nisë hetimet për kryebashkiaken Juliana Memaj.
Mirëpo, kryebashkiakja, duket se nuk po i trembet shumë hetimit, ose po përpiqet të bëjë sa më shumë para, derisa t’i vijë koha e arrestimit, nëse SPAK zgjohet nga gjumi. E themi këtë, pasi Memaj ka organizuar së fundmi një tender, që ka një vlerë marramendëse, krahasuar me objektin e tenderit. Juliana Memaj ka ofruar më shumë se 600 milionë lekë për rikonstruksionin e rrugës së fshatrave SHEQ-GAJDË.
Nëpërmejt një kërkimi të thjeshtë, por edhe e specifikuar vetë nga relacioni teknik i tenderit, kjo rrugë nuk është më shumë se 2,3 km, shtuar edhe zgjerimet e mundshme që mund të bëhen.
Sipas dokumenteve të tenderit, ky rikonstruksion do të bëhet në lidhjen direkte të fshatrave pa dalë në rrugën kryesore Ura-Vajgurore-Tiranë.
Më konkretisht bëhet fjalë për tenderin me këtë numër reference REF-40445-09-01-2022, me objekt “Rikonstruksion i Rrugës Sheq-Gajdë” dhe autoriteti kontraktues është bashkia Dimal me në krye Juliana Memaj.
Mesa duket, Juliana Memaj dhe ekspertët e rrugës në Bashki kanë menduar se 1 km rrugë bën më shumë se 250 milionë lekë dhe kanë ofruar këtë shifër të çmendur. Kompania fituese që do të realizojë ndërtimin e rrugës do të shpallet më datë 19 shtator, e cila nëse ofron sa fondi limit do të kënaqë edhe kryetaren e bashkisë me një dorë të mirë parash.