Goli i vetëm ndaj Leeds United i shënuar nga futbollisti i talentuar shqiptar Armando Broja, ka mjaftuar që të fitojë zemrat e tifozëve të Southampton. Në fakt prej një muaji ata kërkonin aktivizimin që nga minuta e parë të sulmuesit shqiptar. Ndonëse trajneri Hasenhuttl e cilësoi si një rezervë e mirë, presioni dhe kërkesa e vazhdueshme e tifozëve ka bërë që ta aktivizojë nga minuta e parë.
Tifozët e Southamptonit e kanë lavdëruar jashtë mase në rrjetet sociale futbollistin shqiptar, ku ndër të tjera theksojnë edhe faktin që u është dashur të presin kaq gjatë për ta parë titullar në Premier League. Madje ka kërkesa nga ana e tyre që klubi ta blejë përfundimisht kartonin e sulmuesit shqiptar, që është në pronësi të Chelsea-t dhe luan si i huazuar te Southampton.
“Të gjithë fansat e Southamptonit kërkonin të luante Broja nga minuta e parë. Më në fund ai luan dhe shënon golin e fitores së parë. Vë bast se ata janë të shokuar, ne po kërkonim aktivizimin e tij titullar që prej një muaji”- shkruan një tifoz në rrjetet sociale. “Fitore e madhe. I zhgënjyer që Broja është vetëm në huazim. Do të kishte qenë një afrim shumë i madh”- shkruante një tjetër.