Më 16 tetor, katër turistë rusë vdiqën në hotel "Gloria", Qerret në rrethana misterioze. Në fillim u raportua se trupat e tyre u gjetën pranë saunës: njëra prej viktimave ishte shtrirë në një shezlong, dy të tjerët ishin në një stol dhe e katërta ishte në buzë të pishinës, me këmbët e varura në të. Sergey Burenkov, 60 vjeç së bashku me bashkëshorten Natalya Burenkova, 58 vjeç ishin me pushime në Shqipëri, së bashku me vajzën e tyre Katia, 31 vjeç dhe partnerin e saj Nikita Belousov dhe kishin mbërritur në vendin tonë me datë 10 tetor dhe duhet të ktheheshin me 17 tetor.

Media ruse "Courier.Sreda" ka folur me kolegen e Sergei Burenkov, Anastasia. Vajza shprehu versionin e saj të vdekjes së të njohurve të saj. Anastasia pyet veten se si miqtë e saj mund të mbyten në një dhomë kaq të madhe në të njëjtën kohë.

Sergey ishte një njeri shumë i mirë, nuk i kishte bërë keq askujt. Punonim së bashku. Ajo që ndodhi është shokuese. Ata vdiqën menjëherë, as nuk lëvizën. Të gjithë ishin në vendet e tyre. Jam e sigurt që ata nuk mund të mbyteshin apo të helmoheshin njëkohësisht. Dikush do të lëvizte apo duhej të rrëzohej, por ata qëndronin ulur në vendet e tyre. Nuk ka asnjë gjurmë. Ndoshta rezultatet e vërteta të autopsisë nuk do dalin kurrë në media. Ata nuk patën as kohë për të pirë apo ngrënë gjë. Dhe ata që shkruajnë gjëra pa kuptim, do të doja që të mos ndjenin dhimbjen që kemi ne.

Vajza tha gjithashtu se derisa trupat e të vdekurve të dërgoheshin në shtëpi, duheshin kryer disa ekzaminime.

Derisa të na i japin trupat, ne jemi duke pritur për një ekzaminim. Tani ne thjesht po presim.