Detaje të reja janë zbardhur nga vdekja tragjike e 17-vjeçares shqiptare Aurora Grazini.
E reja u gjet e pajetë nga prindërit në krevatin e dhomës së saj.
Raportohet se ajo kishte përjetuar shumë keq një ndarje nga i dashuri i saj, gjë e cila i kishte shkaktuar ankth, pagjumësi dhe depresion.
Sipas mediave italiane, të njohurit e saj kanë thënë se pas ndarjes nga i dashuri, Aurora e kishte humbur buzëqeshjen, oreksin dhe dëshirën për të shijuar jetën.
Shkaqet e vdekjes së adoleshentes shqiptare vijojnë të mbeten mister, ndërkohë që prokuroria ka nisur hetimet për zbardhjen e plotë të ngjarjes.
17-vjeçarja kishte qenë disa ditë më parë në spitalin Belcolle me shenja gripi, por pas disa kontrolleve, ajo u dërgua në shtëpi.
Prokuroria dyshon se rasti i saj mund të jetë nënvlerësuar nga mjekët.
Gjithashtu, Ministri i Shëndetësisë, Roberto Speranza, dërgoi një grup specialistësh për kontroll klinik.
E reja ishte ankuar se nuk ndjehej mirë dhe se kishte probleme shëndetësore, që i kishin shkaktuar humbje peshe.
Mbetet ende e paqartë nëse vdekja e saj ka të bëjë me sëmundjen që kishte, apo ka ardhur si pasojë e gripit.
Ajo ishte studente e kontabilitetit në shkollën "Carlo Alberto dalla Chiesa", dhe jetonte në një vilë të vogël në periferi të Montesiascone.
Rezultati përfundimtar i autopsisë do të zbulojë shkaqet e vërteta të vdekjes tragjike të 17-vjeçares shqiptare.
Burimi: Corriere|Përktheu dhe Përshtati: JOQ Albania
