Në ditën e 8 të grevës së urisë, naftëtari: Po s’morëm rrogat s’lëvizim, këtu do vdesim

Të ishe naftëtar dikur ishte një punë e nderuar, sot në vitin 2020 një naftëtar vuan për një copë buke. Shumë prej tyre nuk kanë marrë pagat dhe prej muajsh dhe e mbajnë frymën gjallë me borxhe.

Punonjësit e nënstacionit të Poçemit prej tetë ditësh janë në grevë urie. Njëri prej këtyre grevistëve u ka bërë thirrje ambasadave të huaja në vendin tonë që të ndërhyjnë.

Ai ka thënë se ata nuk do të ndalen deri sa të marrin pagat që u takojnë. Më pas ka shtuar:

Dita e tetë sa po vjen e po përkeqësohet. Disa nga shokët tanë kanë marrë serume. Nga qeveria nuk na ka ardhur asnjë lloj përgjigje. Presim të na kthejë përgjigje sepse të gjithë jemi njerëz. I bëjmë thirrje të gjithë ambasadave të huaja të ndërhyjnë këtu sepse është një turp i madh. Ne po nuk morën rrogat nuk lëvizim që këtej. Këtu do vdesim të gjithë."

Edhe një tjetër grevist është shprehur se nëse nuk marrin pagat që u takojnë nuk dalin të gjallë nga vendi ku po rrinë.

E më tej ka thënë:

Do e çojmë deri në pikën e fundit. Nuk shikojmë asgjë konkrete. Ne këtu jemi. Po vdesim, këtu do vazhdojmë deri në pikën e fundit.’’