Masat e marra kundër përhapjes së koronavirusit në Shqipëri janë drastike. Lëvizja është me fasha orari dhe gjobat ndaj qytetarëve që thyejnë rregullat edhe për probleme serioze nuk kursehen.
Një kronikë e raportuar disa ditë më parë në një televizion në Shqipëri, tregon kapjen në flagrancë të një qytetari në zonën në afërsi të “Pallatit me Shigjeta”, i cili pas shoqërimit në komisariat nga policia u ndëshkua me një gjobë prej 700 mijë lekë të reja.
Arsyeja e masës ishte për arsye se qytetari kishte thyer rregullat e karantinimit, si person që kishte vetëm pak ditë që ishte kthyer nga Italia.
Lidhur me ngjarjen, për redaksinë e JOQ ALBANIA, ka komunikuar vetë personi i gjobitur.
Ai shprehet shumë i irrituar me ngjarjen dhe thekson se gjithçka është bërë padrejtësisht.
I riu tregon se është kthyer nga Italia në datën 10 mars, ndërsa arrestimi është bërë në 24 po të këtij muaji.
Praktikisht, 14 ditët e karantinimit kanë kaluar dhe i riu ka qënë në përshtatje të rregullave, por gjoba nuk i është kursyer.
Përveç kësaj, ai shton se i mbyllur prej 14 ditësh kishte mbetur pa asnjë ushqim në banesë dhe prindërit nuk i kishte takuar prej dy vjetësh jashtë Shqipërisë.
Kjo arsye nuk është marrë fare për bazë nga punonjësit e policisë, të cilët në prani të kameras janë sjellë sikur po arrestonin një kriminel të arratisur.
I riu tregon gjithashtu se nuk ka ofenduar asnjë efektiv policie, edhe pse kjo përmendet me të madhe në kronikë.
Ai tani kërkon drejtësi dhe gjoba prej 7 milionë lekësh të vjetra t’I hiqet, pasi është e padrejtë.