300 firma duhen që një grupim njerëzish të cilësohen minoritet, me projektligjin e ri për njohjen e të drejtave të tyre. Sipas kryetarit të PBDNJ Vangjel Dule, në Finiq është nxitur një akt urrejtje etnike ndaj grekëve me fshirjen e emërtimeve të tabelave në gjuhën greke. I indinjuar, Dule shkruan në një postim në Twitter se ky fenomen nuk ndodh për herë të parë.
Ai shton se kjo është një vepër penale, por organeve kompetente nuk i shkon ndërmend ta shqyrtojnë. Dule i bën thirrje siç e quan ai spektrit evropian të politikës, opinionit të shëndoshë publik dhe medias që së bashku t’i presin rrugën një herë e përgjithmonë fenomeneve të tilla, autorëve dhe frymëzuesve të tyre.
Dule shkruan:
Prej ditësh, në shumicën e tabelave dygjuhëshe, të vendosura nga autoriteti rrugor përgjatë rrugës nacionale që përshkon bashkinë Finiq, janë fshirë emërtimet në gjuhën greke, gjuha amëtare e pjesëtarëve të minoritetit etnik grek. Ky fenomen nuk ndodh për herë të parë. Dhe megjithëse një akt i tillë:1)përbën vepër penale2)shkel frymën dhe germën e legjislacionit vendas dhe konventave ndërkombëtare për te drejtat e minoriteteve3)dëshmon dhe nxit urrejtje etnike, pushteti vendor hesht, drejtësisë nuk i shkon ndërmend, qeveria mbyll sy dhe veshë. Thirrja jonë për spektrin sinqerisht evropian të politikës, opinionin e shëndoshë publik dhe mediat është që së bashku tu presim rrugën një herë e përgjithmonë fenomeneve të tilla, autorëve dhe frymëzuesve të tyre.
