Ashtu siç e përmendëm në një artikull të disa ditëve më parë, oligarkët e kompanive të ndërtimit duket se nuk mjaftohen me miliardat që marrin nga sektori i Infrastrukturës sa kanë vendosur të hanë edhe një copë nga buxheti i majmë i Shëndetësisë. Shembulli konkret i ilustruar ishte pikërisht Gentian Selmani i Kodrës së Diellit, i cili me kompaninë e tij AGIKONS, në letra padyshim jo në emër të tij, kishte “zby...” të gjithë oligarkët e tjerë të ndërtimit (Fushën, Salillarin, Bardhjus Bushajn, Paqsor Buzin etj) duke fituar një tender nga Ministria e Shëndetësisë me vlerë 4.6 MILIARD LEKË PA TVSH për rikonstruksionin e godinës së Maternitetit Geraldinë.
Në një tender të ri me vlerë 112 MILIONË LEKË PA TVSH për 75 ditë, për mirëmbajtjen e objekteve në QSUT është shpallur fitues me procedurë “Negocimi të Drejtpërdrejtë”, menaxheri i projekteve në kompaninë AGIKONS, Latif Drenovci, me kompaninë e tij IBS, në të cilin është zotërues i 64% të aksioneve.
Tenderi i dyshimtë është shënuar me shkelje për Mungesë Gare dhe Mungesë Konkurrence me Negocim të Drejtpërdrejtë. Ndërkohë që edhe dy tenderat i tjerë i ka të shënuar me FLAMUJ TË KUQ.
Drenovci është gjithashtu pronar i një prej kompanive të Shëndetësisë që ka përfituar nga ky sektor, përkatësisht 125 MILIONË LEKË PA TVSH.
Zotërues me 36% të aksioneve të IBS, është Ilija Dimo, një prej biznesmenëve të ndërtimit që i ka shkaktuar dëme miliona euroshe shtetit shqiptar duke mashtruar me TVSH. Dimos iu dha masa e arrestit me burg e më pas iu lehtësua në arrest shtëpie.
*Shënim I: Pjesët e nënvizuara në tekst apo ato me ngjyrë të kuqe, janë hiperlinke që të drejtojnë në faqe të tjera, informacione shtesë, shpjeguese në lidhje me lajmin*
© 2020 JOQ ALBANIA Të gjitha të drejtat e rezervuara
Ky artikull është ekskluziv i JOQ ALBANIA, gëzon të drejtën e autorësisë sipas Ligjit Nr. 35/2016, "Për të drejtat e autorit dhe të drejtat e lidhura me to". Shkrimi mund të ripublikohet nga mediat e tjera vetëm duke cituar JOQ ALBANIA dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
