Vitin që vjen në Katar do të organizohet Kampionati Botëror i Futbollit. Për këtë arsye, nisur nga kushtet në të cilat ndodhet bota prej Covid, organizatorët e kanë kërkuar ta bëjnë të detyrueshme vaksinën për të gjithë lojtarët që do të marrin pjesë në kompeticionin më të madh të futbollit në planet. Autoritetet shëndetësore të Katarit kanë diskutuar me FIFA-n dhe me palët e treta që t’i garantojnë se të gjithë lojtarët pjesëmarrës të kenë marrë të dyja dozat e vaksinës. Gjithashtu, siç është njoftuar edhe më parë, vaksina do të jetë e detyrueshme edhe për tifozët. "Katari, si vendi pritës, do të sigurojë masat mbrojtëse të kërkuara për të mbrojtur shëndetin dhe sigurinë e të gjithë të përfshirëve në garë"- tha një zëdhënës i FIFA-s për “The Athletic”.
Të gjithë të pranishmit duhet të ndjekin këshillat e udhëtimit nga autoritetet e Katarit dhe udhëzimet e fundit nga Ministria e Shëndetit Publik. Vlen të theksohet se nëse vaksinat bëhen përfundimisht të detyrueshme, disa nga emrat më të mëdhenj të futbollit mund të humbasin turneun pasi ka patur një marrje relativisht të ulët të vaksinës midis futbollistëve profesionistë.